المجموعة الثانية من ديوان بصرخ وأقول الآه (2)

**محاسن بيومي**

سر انتصاري
قالوا البطل ده ابنك
قالوا البطل ده ابني
قالوا البطل ده مسلم
قالوا البطل ده قبطي
قالوا البطل ده جاري
وأنا أعلنت اعتذاري
ابني وإبنك وجاري
هما سر انتصاري
وميلاد فجري ونهاري
قالوا البطل ده مسلم
أنا قلت الفرحة لمه
قالوا البطل دا قبطي
أنا قولت الدين ده رحمة
والوحدة بتبني أمة
هايهل النور علينا
محمد يا نبينا
يا هدية ورحمة لينا
يا ما قلت الاحترام
للدين واجب علينا
وأكيد في الشدة مسلم
يحضن بالحب قبطي
والجنة دي يعني رحمة
وقلوب بالحب تعطي

مليون صلا ع الهادي
قام الدرويش ينادي
يا بلادي يا بلادي
مليون صلا ع الهادي
ابنك يا مصر ضابط
ومرابط ع الحدود
ابنك يا مصر آية
في العزم وفي الصمود
ابنك يا مصر ضابط
مهما تعدي السنين
واقف بالقوة شامخ
مليان حب وحنين
مليون صلا ع الزين
كنايسنا والمساجد
والمصري وهو ساجد
غنوة وفا الاتنين
تحلف وتعاهد الله
ع المصري قول ماشاء الله
نسر وأنواره هالة
نسر وفي العالي طاير
جابلك أغلى البشاير
والنصر بين شطين
يا أحفاد صلاح الدين
مليون صلا ع الزين

يا حكومة الجيب نضيف
يا حكومة الجيب نضيف
ومربي لنا الخفيف
في شتانا وفي الخريف
دا الجيب أصبح نضيف
رحمة لصرخة أنيني
من خصخصة الرغيف
وارمي السلام يا عيني
ع الحر وع الشريف
لو قلت تعض قلبي
قلبي أنا أصلا ضعيف
هاتكون ظالم لسنة
لو يوم عضت رغيف
وأكيد هاتكون بريئة
دا الجيب أصبح نظيف
لو سعدك يوم زمانك
قول للدكتور نظيف
قول له بلغة الإشارة
يا مربي لي الخفيف
مش بالبشاميل باحلم
ولا بالشتا والصيف
في الصف أنا واقف أحلم
أحضن لي أنا كام رغيف
آخد لي معاهم صورة
واتغطى وأنام خفيف
ما احنا في زمن الرغيف
أصبح حر وظريف
بيذل الكون بحاله
واللي مجوع عياله
هايموت وآه يا لطيف
والسكر داب في سعره
دا بصلنا آهو شد شعره
وكاتبنا آهو قال في شعره
ع الحلو حمادة عزو
أصبح غرقان في وزه
يا حديد وآه يالطيف
طيرت العقل والله
الله يا أحمد نظيف
تموينا والبطاقة
ونكد فوق كل طاقة
وهنا مواطن شريف
اتغطى ونام خفيف
جوة الأحلام تلاقي
صورة أجمل رغيف
وعليه م اللحمة حتة
هاتعوم على أحلى فتة
والفرخة دي هانخصامها
بجناحها لفوق تطير
والرز ما يلزموشي
أصبح أكل الأمير
والعدس ما بشربوشي
والفول ما بيرحموشي ؟
أحسن أشرب عصير
وأتغطى وأنام خفيف
دا الجيب أصبح نضيف
باحلم لك حلم لكن
جدا حلو وظريف
يا سلام لو يوم تنام
زي مواطن خفيف
تعرف بالحق إنه
شعبك محتاج رغيف