المجموعة الخامسة من ديوان بصرخ وأقول الآه(5)

**محاسن بيومي**

قلبي يا طفلي البرئ

ياقلبي أنا خليك جرئ
مالأهل ضاعوا والصديق
وحدي أنا وسط الحريق
يا قلبي يا طفلي البرئ
خلاص بقى ...
مش قادرة أداري
ع الدنيا ضعفي وانكساري
ياقلبي ليك كل اعتذاري
ياقلبي ياطفلي البرئ
وحيد وتاه مني الطريق
رغم حيرتي وانهياري
هاعملها واعلن انتصاري
ع الدنيا هاتسلطن أنا
واعلن وفاتك من هنا
لو حتى فات مليون سنا
ولا عمري هاخضع لك
يا قلبي ياطفلي البرئ
ياقلبي أنا خليك جرئ

بداية المشوار

حب وشجر نوار
وحبيب يناجي حبيب
بهمس قلبه تطيب
كل الجراح وتغيب
في بداية المشوار
تقول عيونه ياليل
ترقص نجوم الليل
تبقى الليالي انهار
تطول ليالي الشوق
بجناحه يعلا لفوق
في بداية المشوار
ياسلام لو الإنسان
يصبح كما الريحان
في الحر نسمة صيف
تمحي الألم والزيف
قلبه ف شتاه دفاه
والدنيا ماشية معاه
في بداية المشوار

ياسلام ع الحب

لو يتولد يوم حب
م الهم يصفى القلب
وكل طفل شريد
عمره ما يبقى وحيد
لو يتولد يوم حب
تطرح ليالي زهور
ويدق قلب النور
يطرح جنانين ورد
لو يتولد يوم حب
يرحم قوي لضعيف
ويرق قلب السيف
القلب يبقى نظيف
لو يتولد يوم حب
للخلق يبقى ضمير
رمز الإيمان والخير
والمولى فضله كبير
لو يتولد يوم حب

اشتياق

يا حبيبي..
كان نفسي أشوفك
تلمس إيديا أنا بكفوفك
شفت القمر أنا في عيونك
يا حبيبي كان نفسي أشوفك
أشواقي تعزف لغرامي
وتروق وتحلالي أيامي
ساعة ما أشوفك قدامي
ع القلب كان مرسوم طيفك
يا حبيبي كان نفسي أشوفك
وسمايا بيك تباهي نجومها
تشوف عيونك في منامها
وانت جميل قوي قدامها
يا حبيبي كان نفسي أشوفك
وعيوني تصبح فرحانة
في جمال عيونك سهرانة
يا حبيبي كان نفسي أشوفك

خـــلاص
يا ما كنت اتمنى تسأل
وأنت تتقل وتتقل
يا خسارة على الهوا
لو ضاع معنى الحياه
إزاي الحب يوصل
وأنا كنت أتمنى تسأل
وأنت تتقل وتتقل
يا ما كان قلبي معاك
دايب حب في هواك
وفي فرحك وأساك
كان دايما قلبي يسأل
لكن خلصت خلاص
لازم هاوضع أساس
والجرح في الإحساس
يقول للحب يرحل
كان حبك لي الهلاك
وأنا قلبي راح ينساك
منايا في يوم لقاك
ما أسألشي ولا أنت تسأل
ياما كنت أتمنى تسأل
وأنت تتقل وتتقل

احنا اللي هما وهما احنا

مين اللي يقدر يغلبنا
بإيدينا نغزل في عيوبنا
ونقول ده مين راح ينقذنتا
وشبابنا نايم على نفسه
على القهوة وفي وسط بيوتنا
بإيديه يدور على يأسه
عاوزين حكومة اتوظفنا
ما احنا اللي هما وهما احنا
لو جينا يوم واتوظفنا
بنزوغ كتير من وظايفنا
والقهوة تاني تجمعنا
والنصية والبنت الحلوة
وشباب يقول أحدث غنوة
ولا نبقى جينا ولا رحنا
بقى هو ده مجد بلادنا ؟
وإزاي نزود إنتاجنا
وإزاي تزول سلبياتنا
واحنا اللي هما وهما احنا
ولاحد قادر يفهمنا
وماضينا عقد عالم تالت
ونصبنا زينة أفراحنا
أحوالنا بينا وآهي مالت
فين الحكومة اتفرحنا
هنام شوية في أحلامنا
يمكن نقابل أيامنا
واتجينا فرحة تفوقنا
مش بردو ركن في إسلامنا
في عملنا واجب إتقانا
ونهايته نوصل للجنة
واحنا اللي هما وهما احنا
شباب ونايمين على روحنا