محاسن بيومي (دمعة أمة بلا عيون)

شفت منام
شفت منام واحترت انا فيه
شفت وطنا بكل ما فيه
خلق بتبني وخلق بتهدم
خلق بتغلط ولا تتعلم
خلق بتكره يوم تتقدم
شفت منام واحترت أنا فيه
كل الدنيا آهي بتتقدم
والمبروك عقله ف رجليه
شفت الغرب وعقله الساطع
علمه النافع هو الدافع
سبق العقل لسانه في إيديه
شفت منام واحترت أنا فيه
شفت حضارة مينا وخوفو
تنادي الدنيا تعالوا وشوفوا
شفت هرمنا بكل كسوفه
بيدعي لرب الكون بكفوفه
تبكي المر الحلوه عنيه
شفت منام واحترت أنا فيه
شفت الحلوه دي ماشية بتشكي
شفت تراب الأرض بيبكي
حتى الدين وتجارتم بيه
رغم المولى لرسله ف كتبه
شرع الحب ما بين أديانه
شرع العدل في كل أراضيه
شفت منام واحترت أنا فيه
شفت الغرب بلاده نضيفة
شفت بلادنا عقولها خفيفة
شفت قمامه وأبصر إيه
شوشو وتوتو وطنط شريفة
يحكوا لبعض ف قعدة لطيفة
ده بيتجوز أو هيطلق
شفت منام واحترت أنا فيه
أنقل أشرف وشريف بيه
مسكوا الطاولة وهات يا مساءلة
وفيلم السينما راح يكون إيه
بكرة القهوة وبعده في ندوة
ومجد بلادنا الرحمه عليه
بعد السينيما وزوم أو موليدي
من الدنيا دي هنطلب إيه
شفت منام واحترت أنا فيه
شفت السينما وزوم مع موليدي
دايرة تدمر في شباب بلدي
حاطه نقطها لكل حروفها
خيارها عنبها وضاربة كفوفها
حتى حمارنا يا روحي عليه
سعدوا زمانه وغنم ليه شفت منام واحترت أنا

كان جدو نونو
الحلوة عيونه
تصحي القلب بكل شجونه
عاشق وطنه
ماعمره يخونه
كان جدو نونو
ورغم أنينه يشكي لرب الكون ويعينه
يكبر زرعه ف أرض حنينه
كان جدو نونو
بطبعه حنون
طيبة قلبه تساع الكون
كان جدو نونو
آه يا حلاوته
نور عقلي بكل ثقافته
قال العقل ده يوم هينور
هاكبر ويا الفكر ويكبر
محلا كتابنا العلم ينور
كل الخير جواه ف مضمونه
كان جدو نونو
وأنا بردو نونو
هعشق وطني وعمري ما أخونه
وافدي ترابه وسماه وأصونه
كان جدو نونو

دم العروبة البارد

عروبة يا باردة قلب الوليد مسكين
من خوفه م الدنيا خايف تشوفها العين
سكن الأنين قلبه واستشهدوا الغاليين
يا عروبة يا باردة ابني الوليد مسكين
يا عروبة يا باردة روح الوليد شاردة
قال أمنا واحدة وأرضنا واحدة
كل الجباه ساجدة تنده صلاح الدين
والمجسد النبوي والقدس وفلسطين
والعذرا والصخرة غزة ودير ياسين
من قهرها بتصرخ ليه تقتلوا فلسطين
يا عروبة يا باردة قلب الوليد مسكين
حزنه ما بين ضلعه قبل الأوان بأوان
يا أم القلوب جاحدة قلب الشهيد تعبان
ليه الأخ يقتل أخوه والفرصة للعدوان
تتعالى يوم ورا يوم ويموت الشجعان
يا عروبة يا باردة قلب الوليد حيران
بيننا ما فيش وحدة وتفرقوا الإخوات
يا عروبة يا باردة كل القلوب شاهدة
إبليس بقاله مكان يسكن قلوب رافضة
للدم أي حنان أو حتى نبض إيمان
في الشدة ينفعنا نرفع في كل أدان
راية تكون مدنه نصرة في كل مكان
يا عروبة يا باردة دمك بقى مألوف
ف صفوف عالم تالت قبلك ويا ما ألوف
غلبت في موالك تحلم بجمع صفوف
وتشدي ترحالك إبليس حبيب ملهوف
بجناحه يسعا لك ويضلل الملايين
يا عروبة ابني حزين
يسألني فين ومنين بلاد العرب ولمين
ابني بيتأسف مليون أسف واتنين
يتمنى يستشهد ولا إنه يبقى أسير
أمة ما تتوحد والعقل فيها فقير

سواد الليل
صحيت في عز الليل
ودموعي سالت سيل
بعيونها تتحقق
وتبص وتدقق
مين شق قلب الليل؟
وخلا طفلي ذليل
ومين راح يصدق
نبض القلوب أصدق
عصفوري طال به الويل
وإمتة هيزقزق
أنا قلبي أصله أصيل
غنى بلحن الويل
خلا الصخور تنطق
من قلبي نبض الصمت
الصرخة راح تحرق
فجر العروبة غاب
وإمتة هايشقشق
من نوره راح يخلق
أمة لشعوب تسبق
ولاقيت قنابل سيل
شقت ظلام الليل
على غزة وبتحرق
لصفوفنا بتفرق
فتح وحماس على مين ؟؟؟
سيف العزيز خندق
في القلب وبيرشق؟؟؟
ولا عمر نصر يكون
ولا عمرنا هنسبق
إمتة يزول الليل؟
إمتة الضمير يُصدق

هموم شاعر
أنا شاعر بالهم وضاع
عنواني ف بحر الأوجاع
والشدة اتولد إبداع
أنا شاعر بالهم وضاع
عنوانه ف حيرته وأنينه
أسنانه الحلوين وجعينه
من كتر وجعهم واسنينه
عاملين كده في دماغي صداع
أنا شاعر بالهم وضاع
والثانية تعدي بسنتين
والضرس بيوجع ضرسين
قربت لسن التسعين
مع إني أنا أصغر باسنين
قلبي وهفتان بطني وجاع
أنا شاعر بالهم وضاع
باصرخ وأنادي على جيراني
ملعونة يا ضبة أسناني
آخرتها هتختم بجناني
من سهر الليل والأوجاع
أنا شاعر بالهم وضاع
وجريت على دكتور أسنان
سوسة تانية بتاكل أكلان
وتمص لجيبي التعبان
أنا شاعر بالهم وضاع
عنواني يا ناس وسط أصحابي
مقصوف على عمرك يا شبابي
آهو لعب البخت ف أنيابي
والهم يا ناس شراني وباع
أنا شاعر بالهم وضاع